فاش كتوصل 26 أو 27 سنة من عمرك ؟

قراها مغديش تندم :

معناها أنك مابقيتيش تقدر تصوني على الديور وتهرب ، مابقيتيش تقدر تسهر الليل كامل مع الحبيبة ع الواتساب ، مابقيتيش تقدر تعصر قدام الليسي ، ومابقيتيش تقدر تغلط .

مور 26 سنة غادي تندم على بزاف دلحوايج دوزتيهوم ، وبزاف دناس دخلتيهوم لحياتك ، أتولي فسباق مع الزمن باش تحقق حلمك وتخلي واليديك يفتاخروا بك قبل ما تفرق بيناتكوم الموت ، مامعنى كتكون قربتي لتلاتين من عمرك ؟

معناها أنك غادي تحسد مول 18 سنة و مول 20 و مول 23 ، حيت عندهم فرصة يقرروا ، واش 26 أو 27 سنة كتكون مرحلة الحصد ، ولا مرحلة التيه ، واش غادي يكونوا رسموا طريق لحياتهوم ، ولا تالفين مع البيطالة وقلة الشي.

من 18 سنة ل 23 سنة اقسم لكم خوتي انها مرحلة القوة ، الحماس ، المرحلة لي تخليك تبني احلامك واهدافك ، فعافاك مضيعهاش فالمصاحيب و تيتيز والعصير ، والسهير والبلية ، بني حياتك خويا ، راه الشيب لي فراس باك ولا امك علامة من علامات انه مابقاش بزاف ، الموت ماعندها وقت ، ولكن دير شي حاجة لي تخلي واليديك يفرحوا بيك ، حيت اقصى ما كيفرح الواليدين هو يشوفوا ولادهوم ناجحين ، واش تبغي امك تحني الراس ملي الناس كيعاودو على ولادهوم فين وصلوا وهي حشمانة تقولهوم ان ولدي حشايشي بطالي فنيان ، الكبدة غادي تغلبها وتقول ولدي ماعندو زهر ، ولكن الكبدة ماعندكش باش تعري على كتافك .

دمر على رزقك خويا ، فاشما كان ، ودير فبالك انك فبلاد لي مافيهاش لي يعاونك ، آمن براسك وجرب اي حاجة ، أي حاجة مدام انها حلال ، على الاقل وخا ما توصلش ، ايقول عليك باك ولا موك ، ولدي راه راجل ... 🔥🔥